الرئيسية > ~ ووردبريس, ~ ســلّوريات > ثيم ووردبريس من تصميمي للي بدو و اللي ما بدو لهمي و قبيعة عمي :)

ثيم ووردبريس من تصميمي للي بدو و اللي ما بدو لهمي و قبيعة عمي :)

الجمعة, فبراير 12, 2010 أضف تعليق Go to comments

*تحديث : تم تعديل ملفات الثيمين , لإنو يبدو إني عدلت على شي ملف php بالنوت باد من دون قصد و بهيك كان صار مشاكل باللغة , فبعتذر عن هالخطأ و تم تعديله أكيد 🙂

Sallorya1-dark

مشاهدة | تحميل

 

scn-pre

نفس الثيم بنسخة بناتية

مشاهدة | تحميل

 

مرحبا , كيفكون إنشالله منيحين ؟ مو عايفين التنكة متلي ؟!

إي هاد ثيم ووردبريس بقالي فترة عم صممه و استوحيت تصميمه من القالب المستخدم في مدونة حمود آرت “hamoudart.com/ar” يعني حبيت بساطة التصميم , الثيم خفيف و متوافق مع أغلب المتصفحات جربته على (فايرفوكس,إكسبلورر العقيم ) و بيدعمهن ع أكمل وجه , و للأسف الإكسبلورر حرمني من إنو طبق تأثير الشفافية على الشيت و البلوكس بحيث إنو خليها شوي تشف ع الأرضية اللي تحتها لكن الكود عطى نتيجة مع الفايرفوكس و الإكسبلورر متل عادته متنح و مصر ما يبين الشفافية فقلت بلاها .

يعني و بما إنه المستخدم العربي ما بيحب منية حدا و منيتي ع حالي فما حبيت حط حقوق على الثيم , إلكن الحرية المطلقة بالكتابة بالفوتر يلي بتحبوه , و متل ما بتعرفوا نسخة الووردبريس بتيح الكتابة في الفوتر من داخل لوحة التحكم تبعها .

بدي فضفضلكن عن شغلة , هاد يا سادة يا كرام مريت على كذا مدونة تقنية بهدف الإستفسار عن شغلة في أكواد الووردبريس ألا و هيي كيف أعمل إتجاه البولتس (bullets) و هي النقط التعدادية يلي بتكون في القوائم الجانبية أو بشي تدوينة كاتبينها , إي و أغلب هالمدونات يلي مريت عليها كانوا كاتبين عن حالن إنو هدفن إثراء المحتوى العربي –ريتني إعدمو- و تقديم الحلول للمستخدمين العرب و من هالحكي اللي بلا طعمة و طبعاً في صفحة راسلني لا بد من كتابة كلمات الفضائل و المثل من إنو كتير بكون سعيد “مو أنا” إذا راسلتني لو كان عندك أي إستفسار أو سؤال أو إقتراح أو  أو إلخ من هالحكي , فأنا قلت و الله شي جميل لنسألن على هالبولتس مع العلم إني نقيت الناس يلي عم تضرب علينا هالمُثل هي تبعيت إثراء المحتوى و ما بعرف شو .

بعتنا أول إيميل لكذا مدونة من هالمدونات التقنية على مدى عدة أيام ما حدا نطق شي فترة اسبوع بعتت إيميل تاني بإنه تأكيد على وصول الإيميل الأول و كمان حطيت سؤالي كردود في كم مدونة من هدول تبعون الإثراء ! .

شخص وحيد رد و للأسف كان بعدم معرفة الإجابة بس قلي حاول كذا و ما مشي الحال , هالشخص تقريباً من بين أربع أو خمس مدونات راسلتها ما عدت إذكر و هالمدونات مشهورة و بتنزار كتير و يعني ما بظن مشغولين هالقد يعني مهما كان فترة من 3 أسابيع لشهر ما ترد على تعليق أول رسالة عن طريق مدونتك و إنت ليل نهار واقع تسجيل بفيديوهات و مستحليلي حالك يا تقبر أمك , المهم الواحد ما بيتعلم إلا من كيسو و أنا أصلاً غاسل إيدي من زمان بإني دور على شي بالأول ضمن المحتوى العربي , بدي أعرف معلومة ليكا المواقع الأجنبية ما بترد حدا و فيها كلشي لكن حكمنا الزمان بما إنو هالشي محصور على المستخدمين العرب يلي بيستخدموا لغة الكتابة من اليمين لليسار , مااااا علينا 🙂

قال إثراء محتوى عربي قال , لا و النهفة في واحد منن كاتبلي عن حاله أنا مدون محترف تفرغت للتدوين ذكرني بكلمة عادل  إمام بشي فيلم لمن قال ( طب أنا قاعدلكوا بقى ) خلص الزلمي إتفرغ للتدوين بعدوا هيك , و الله ماكنت أعرف شو دين هالإثراء تبعهن هاد , حدا بيعرفلي؟

هو في نظرية الآلهة ,  تغييب المعرّفات عن الآخر من هون بتستمد الآلهة قوتها , يعني إذا صاحب هالمدونة هاد عطى اللي سألتو عليه إي ما بيعود يبين إنو فطحل و فهيم و عين الله عليه , لازم يخليلك شي مُبهم مُغيب عندك مشان تضل تنظرله هديك النظرة الألااااوية 😀 .

على كلن بيجوز أنا حظي بيهوي كالعادة و وقعت بمدونات أصحابها هيك , يالله مو مشكلة عرفت حل المشكلة لحالي و بلا منية حدا 😉 .

مشان الثيم ,  ممكن ينضاف للثيم هيدر بدال النص الكتابي , يعني أنا حبيت خلي النص موجود مشان اللي ما بدو يتعذب و ع الأسهل يعني و هو المنتشر , فإذا حبيت تضيف بدال النص الكتابي اللي في هيدر المدونة اللي بيحوي على إسم مدونتك و وصفها , حبيت تضيف صورة مثلاً متل هيك :

pre-H

فهالأمر متاح و سهل بينعمل بخطوتين بس :

الأولى : في ملفات الثيم ملف اسمه “header”  رح نفتحه بالمفكرة و نظلل هالسطرين و نحذفهن مشان نلغي ظهور إسم المدونة و وصفها الخطي من الهيدر.

He-2-de

الثانية : بعد ما تصمم هيدر لمدونتك بحجم 85 بكسل للطول و 200 بكسل للعرض رح بتحطه في ملف الصور تبع الثيم و سمي صورتك بهالإسم :  Header و خليت إمتداد الصورة PNG لأنها ع الأكيد رح تكون بهالإمتداد مشان الشفافية .

مشان يصير الثيم أكتر خدمية و جمالية , أنا بقترح هالإضافتين الأولى مشان المشاركة اسمها “sociable” و عليها المثال متل ما شفتوا و هي حملوها من ووردبريس من هالرابط و إضافة سحابة الوسوم الفلاشية فيكن تحملوها مع شرحها من هالرابط , و بتمنى الثيم يعجبكن و اعذروني ع الفضفضة بغير محلها بس كان لا بد منها منغاظ منهن كتير , و مية هلا 🙂 .

Advertisements
  1. الجمعة, فبراير 12, 2010 الساعة 7:08 م

    ما شاء الله تصميم روعه وجميل و ألوان هادئة
    و إن شاء الله ننتظر جديد أعمالك

    • السبت, فبراير 13, 2010 الساعة 7:48 ص

      تسلم هاد من ذوقك
      شكراً لمرورك أبو الجود 🙂

  2. الجمعة, فبراير 12, 2010 الساعة 8:07 م

    خيو انا ما بدي 🙂

    بس ضحكتني على هدول جماعة إثراء المدري شو
    مسخرة يا رجل !!
    الواحد يتعلم شغلة ويعض عليها بسنانه . . لهيك ما رح نصير

    تحياتي

    • السبت, فبراير 13, 2010 الساعة 7:53 ص

      ليش ما بدك خيو معناتها لقبيعة عمــ .. لا لا إنت مستثنى من هالقاعدة 🙂
      عم قلك شي بينكرز البدن يا زلمي , صح متل ما قلت و كإنو اللي علمو هالشغلة ما رح يعلمنا , شكراً كتير ع المرور خيي عبد السلام .

  3. الجمعة, فبراير 12, 2010 الساعة 9:15 م

    مرحبا، كيفك 😀

    أول شي شكرا عمشاركتك للثيم المرتب و باعتبار فضفضتلنا عن اللي صار معك و هو مؤسف، اسمحلي فضفضلك عن حركة مفيدة أحيانا لمّا نحتاج تعديل منطقة من الصفحة و ما متعاملين مع التطبيق أو ملفات الموقع من قبل، فحتى نشوف الشي اللي لازم نعدله (class أو id لشي شغلة) حدد الشغلة و باليمين (بالفايرفوكس) فيو سيليكشن سورس بتشوف الكلاس أو الآي دي و بتعمل عنه بحث بملفات الـ css.
    أما بالنسبة للشفافية، فإذا كنت تقصد أنك استخدمت opacity و مشي الحال في فايرفوكس و ما مشي في انترنت اكسبلورر استخدم من أجل انترنت اكسبلورر :
    filter : alpha(opacity=70);
    اللي تكافئ في فايرفوكس :
    opacity: 0.7;

    إذا هيك بتقصد.

    مع التحيات 🙂

    • السبت, فبراير 13, 2010 الساعة 8:04 ص

      يا أهلين , ماشي الحال =)
      العفو و هاد من ذوقك , هلاء الشغلة الأولانية إي بطبقها بطريقة أو أخرى و بتفيد فعلاً لأنو الواحد بيكون ضايع و مالو خبرة .
      إيه حطيت اوبستي و حددت قيمة معينة إلها و مشت ع الفايرفوكس و لمن دورت على حل مشان الإكسبلورر لقيت شرح لهلشي و طبقتو بس كان يطلعلي بالفايرفوكس درجة شفافية معنية و بالإكسبلورر شفافية غير فالسبب إنو ما كنت عرفان النسب شلون بتختلف من متصفح للتاني و هي إنت قلتها , مو كنا نتكعمش فيك يا زلمي بدال هدوليك الناس تبعون الإثراء , يقطع عمرن إنشالله 😀 .
      شكراً كتير لمرورك سلام و ممنونك أنا

  4. السبت, فبراير 13, 2010 الساعة 8:09 م

    المصيبة كل واحد ماتعلم شي بسيط بيحسب حاله افلاطون زمانه ..
    طيب ماهو انت قاعد على مدونتك صارلك سنين يعني المفروض فعلا تطلع افلاطون ياعمي !
    ولما تيجي تسأله مثلا .. يمكن مايعطيك المعلومة( هذا لو اخذنا بحسن النية ان الظروف كانت عادية وانه ماكان مشغول او في ظروف منعته من الرد السريع او صارتله سكته قلبيه قبل مايشوف سؤالك )

    ماهو فعلا الآلهة بتاخذ قوتها من استحواذها على مالايوجد عند غيرها … فهي آلهة..
    ربنا يستر ومايتطبق هالأمر على المستوى البشري فيكون فعلا انتهينا..

    بس كرم كبير منك انك بعد كل هالمجهود تقدمه كورقة رابحة لكل زائر لمدونتك على طبق من روعة وذهب … واتفضلوو خذو ببلاش ..

    مثال حلو .. انك بعد ماعشت مرارة التجربة انك ماتنضم لهم بل تعلمنا ان اللي صار لازم مايصير…
    ياعمي خلي الآلهة تلعب مع حالها … ومشكور عالثيمات … روعة !

    • السبت, فبراير 13, 2010 الساعة 8:42 م

      يا أهلين
      إنتي بتعرفي أديش إتعذبت لحليت هالمشكلة اللي كنت عم بسأل عليها , و الله فعلاً مشكلة و فعلاً ما بيحك جلدك إلا ضفرك يا ستي و نحنا بدنيا كل مين إيدو إلو =) , و مشان هالآلهة هي بدي ما ضجلي شي كفرية هلاء حفاظاً على الذوق العام 🙂 , و هاد من ذوقك يا ستي لا كرم و لا شي مافي شي مستاهل مافي شي حرزان 🙂 , و شكراً كتير لمرورك يا ست بياض

  5. الأربعاء, أكتوبر 27, 2010 الساعة 10:47 م

    تسلم

  6. الثلاثاء, أكتوبر 20, 2015 الساعة 8:00 م

    بتزبطلي مدونتي الصوصية المتواضعة؟😂

    • الجمعة, أكتوبر 23, 2015 الساعة 1:13 ص

      لك نحنا هون ما بنقدر نطلع عن الثيمات يلي حاطيلنا ياها , نحن جماعة الكادحين و صغار الكسبة 😀

  1. No trackbacks yet.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: